Kryeministri Edi Rama tha se procesi i të gjithë hartëzimit digjital të pronës ende nuk ka përfunduar dhe se cikli i titujve të pronësisë nuk është mbyllur.
Në rubrikën ‘Sy m’Sy’, Rama tha se qytetarët kanë të drejtë të ankohen sa i përket çështjes së titujve të pronësisë.
Ai theksoi se edhe Bashkimi Europian e ka konstatuar këtë fakt, duke e vendosur në kushtet e përfundimit të negociatave.
“Sot ministritë nuk bëjnë më tendera. Ministrat nuk janë më të lidhur me procese tenderimi se janë të gjitha të kaluara në struktura të tjera dhe ka një strukturë të posaçme që bën pjesën më të madhe të tenderave.
Korrupsioni është tek kontaktet te ndërveprimit mes qytetarit që kërkon një shërbim dhe atij që është në sportel. Ka qenë një kohë kur edhe për të marrë një certifikatë, rregullisht paguaje bakshish. Për herë të parë dhe nuk e kanë të gjitha vendet e BE, ata që janë jashtë edhe në kontinente të tjera mund të marrin një shërbim përmes platformës e-Albania. Vijmë te lejet e ndërtimit që kanë kaluar në një fazë tjetër.
Akoma nuk ka përfunduar procesi i të gjithë hartëzimit digjital të pronës dhe nëse sot sa i përket titujt të pronësisë, kemi një progres të konsiderueshëm sepse nuk ka më radha tek hipoteka, dhe shërbimi merret duke aplikuar online dhe vjen me postë, nuk e kemi akoma ciklin e mbyllur.
Jemi të vetëdijshëm që sistemi ka ende korrupsion, pikë dhe nuk diskutohet.
Por ama në planin e negociatave, sepse edhe BE e ka konstatuar këtë fakt që s’do një shkencë të madhe, dhe e ka vendosur një nga kushtet e përfundimit të negociatave që duhet të përfundojmë të gjithë hartëzimin digjital të pronës, dhe kur? Brenda planit të negociatave që është fundi i vitit 2027, që për këtë na është lënë afat 2028 si një kohë e ndërmjetme kur negociatat konsiderohen të përfunduara teknikisht dhe çështja di të shkojë në nivelin e Këshillit Europian dhe pastaj do kalojë për tu ratifikuar anëtarësimi i Shqipërisë në vendet anëtare. Patjetër që qytetarët janë të drejtë të ankohen sa i përket çështjes së titujve të pronësisë ku është bërë një përparim i madh”, tha Rama.
