Këtë të martë është firmosur marrëveshja për forcimin e sigurisë së sistemeve digjitale në vend mes qeverisë shqiptare dhe kompanisë së mirënjohur amerikane, “Jones International”, e cila drejtohet nga një personalitet i ushtrisë dhe i politikës amerikane, James Logan Jones Jr. Në ceremonin e mbajtur ka qenë i pranishëm edhe kryeministri Edi Rama.
Gjatë fjalës së tij Rama është shprehur se në sajë të bashkëpunimit, do të ngrihet një qendër Kombëtare për Mbrojtjen e Sigurisë Kibernitike.
“Një sfidë e jashtëzakonshme por jemi të bindur që duke pasur ndihmën e amerikanëve, do ja dalim të kemi një qendër kombëtare sigurie kibernetike që do jetë një vlerë e shtuar edhe për vetë NATO-n duke dhënë shërbime edhe përtej kufijve të Shqipërisë. Patëm një ngjarje të rëndë me rrjedhjen e pagave të punonjësve në Shqipërisë. Ky lajm sot është shumë i mirë për ata që u lënduan nga dalja e të dhënave personale. Ishte një e keqe që nuk erdhi vetëm për keq pasi shqiptarët panë me sytë e tyre një problem të cilin sot e kemi më të lehtë se dje që ta adresojmë në aspektin e marrëdhënies ligjore dhe morale të shumë punëdhënësve me shtetin dhe punonjësit. Qytetarët përjetuan edhe efektet negative të një sulmi mbi sistemin ç’ka e bën marrëveshjen e sotme edhe më të mirëseardhur për ta.”-tha Rama.
