Një histori e çuditshme që zgjat rreth gjysmë shekulli bashkon prodhuesin suedez të makinave, Volvo, dhe Korenë e Veriut në një marrëveshje shitjeje që nuk pati rezultatin e synuar dhe mbetet një “gjemb” i përhershëm në marrëdhëniet mes dy palëve.
Fillimi i kësaj ngatërrese daton shumë dekada më parë, kur pas përfundimit të Luftës së Dytë Botërore, të gjitha vendet e botës po përpiqeshin të rikuperoheshin.
Mes tyre ishte edhe Suedia, e cila në mesin e viteve ’60 ishte tashmë e stabilizuar ekonomikisht. Volvo ndodhej në procesin e zgjerimit të operacioneve të saj dhe synonte eksportet në vende të ndryshme të botës. Në fakt, suksesi ishte i madh në vende si Britania, Franca, SHBA-të dhe të tjera, me “Made in Sweden” që u bë sinonim i cilësisë dhe teknologjisë së përparuar.
Mes euforisë që mbizotëronte, qeveria suedeze dhe Volvo vendosën ta shohin Korenë e Veriut si një mundësi të mirë për të bërë biznes. Edhe pse problemet ishin të dukshme dhe ekonomia e vendit mbështetej në ndihmën e huaj, ata panë potencial për rritje në këtë treg. Për të promovuar më mirë veten, qeveria suedeze hapi një ambasadë në Phenian, duke u bërë vendi i parë perëndimor që ndërmori një hap të tillë.
Marrëveshja parashikonte shitjen e 1,000 makinave Volvo 144. Suedezët ishin të entuziazmuar, por nuk e kishin parashikuar që koreano-veriorët nuk kishin ndërmend të paguanin asnjë qindarkë për makinat që do të merrnin.
Volvo i prodhoi dhe i dorëzoi të gjitha makinat, të cilat u nisën drejt Koresë së Veriut. Në total, procesi zgjati një vit dhe automjetet u shpërndanë ndërmjet anëtarëve të shquar të partisë dhe qeverisë.
Volvo 144 ishte një makinë e shkëlqyer për vitet 1970 – jashtëzakonisht e besueshme dhe funksionale. Ishte me katër dyer, me motor me 4 cilindra, dhe pati një sukses të madh në disa tregje ndërkombëtare.
Modelet e ndërtuara në vitet 1972 dhe 1973 u dorëzuan në Korenë e Veriut dhe, sipas raportimeve, dhjetëra prej tyre janë ende në qarkullim në vend, ku makinat janë ende një luks i rrallë.
Edhe pse Suedia i dorëzoi automjetet, Koreja e Veriut nuk i pagoi kurrë 110 milionë eurot që përfaqësonte vlera e tyre në atë kohë (1976). Pheniani nuk iu përgjigj kurrë kërkesave për pagesë, por as Suedia nuk e harroi këtë borxh.
Që atëherë, autoritetet suedeze janë rikthyer rregullisht, një herë në çdo dy vjet, për të kërkuar paratë. Sipas Ministrisë së Jashtme suedeze, borxhi është rritur dhe sot vlera e tij arrin në rreth 277 milionë euro.
Megjithatë, përfundimisht, qeveria suedeze vendosi ta shlyejë vetë Volvon dhe të marrë përsipër presionin diplomatik për të rikuperuar paratë – një skenar që ndoshta nuk do të realizohet kurrë, pasi regjimi i Kim Jong-un ka gjëra të tjera për të cilat duhet të shqetësohet.
