Kryetarja e Këshillit të Lartë Gjyqësor, Neureda Llagami ka prezantuar këtë të hënë në Kuvend raportin e KLGJ-së për vitin 2022.
Pas prezantimit të raportit, kreu i grupit parlamentar të PD-së, Gazment Bardhi, ka pyetur Llagamin se pse mbahen fshehur zgjedhja dhe verifikimi i kandidatëve për gjyqtarë.
“Kemi nevojë të dimë pse KLGJ zgjedh një kandidat në raport me një kandidat tjetër. Si e bëni promovimin në gjykatat përkatëse? Kjo është një praktikë e paligjshme. E dëmshme. KLGJ-ja të rishohë praktikën e ndjekur deri tani”, deklaroi kreu i Grupit Parlamentar të Partisë Demokratike.
Nga ana tjetër, Kryetarja e Këshillit të Lartë Gjyqësor shpjegoi se ajo që ky institucion nuk ndan me publikun është verifikimi i figurës së kandidatit dhe kjo pas këshillimit me agjencitë ligjzbatuese.
“Këshilli ka 2 procedura, procedurën e parë që ka të bëjë me verifikimin. Ajo që ne mbajmë të mbyllur dhe që e kemi mbajtur të mbyllur është fakti i verifikimit të figurës së kandidatit. Pjesa që ka të bëjë me vlerësimin apo me renditjen nuk mbahet asgjë e mbyllur. Tek pjesa e verifikimit të kandidatit, ne kemi folur me të gjithë agjencisë ligjzbatuese dhe kemi marrë praktikat më të mira se si duhet të veprojmë dhe ato na kanë trajnuar dhe ato na kanë orientuar që nuk mund t’i deklasifikojmë informacionet që në kemi me të cilat hartojmë relacionin mbi kandidatin.”-tha Llagami.
