Kryeministri Edi Rama ka mbyllur takimin e tij në Kavajë me një minutë heshtje, në nder të Papa Franceskut, i cili u nda nga jeta sot.
Ai e mori vesh lajmin teksa ndodhej në takim elektoral në Kavajë.
Teksa e cilësoi një Papë të veçantë, ndau një bisedë me të gjatë një takimi mes tyre në Vatikan.
“Ishte një Papë ndryshe nga të tjerët dhe besoj që kemi, kam mirëkuptimin tuaj ta nderoj me një minutë heshtje dhe ta mbyllim këtu takimin. U prehtë në paqe! Më kujtohet që në takimin e dytë, se jemi takuar disa herë në Vatikan…
E pyes, i them “Ati i Shenjtë, më duket se shumë armiq ke bërë duke thënë gjëra që nuk i ka thënë kurrë një Papë. Tha, kryeministër nëse nuk i them ato që kam për të thënë tani që kam me njerëzit, kur do t’i them dhe kur? Krimbave kur të shkoj në varr?!”, u shpreh Rama.
