Shtëpia e Fishtës, peng i kujt është?

LEZHË- Pasardhësit e Gjergj Fishtës i rikthehen apelit të tyre për restaurimin e njërës shtëpisë ku jetoi poeti, në Fishtë të Lezhës. Gac Ndoka thotë se biznesmeni kosovar, Sabri Maxhuni është vetëofruar për restaurimin por nuk i është dhënë ende leja nga Ministria e Kulturës. I kontaktuar në telefon, Zëvendësministri i Kulturës Zef Çuni, tha se në Ministrinë e Kulturës nuk ka mbërritur asnjë kërkesë apo projekt nga biznesmeni Sabri Maxhuni, për ringritjen e kësaj shtëpie. Sipas Çunit, banesa ku Gjergj Fishta, kaloi një pjesë të jetës së tij, ka probleme pronësie. Vetëm pasi palët të bien dakord sipas Çunit, Ministria e Kulturës në bashkëpunim me Drejtorinë Rajonale të Kulturës Kombëtare Shkodër do të nisin projektin për restaurimin e kësaj ndërtese.
Ndërsa shohim që ministria qendron në pritje që problemi i pronësisë së një shtëpie muze të zgjidhet vetë dhe familjarët që apelojnë për nisma individuale pa dashur lind pyetja: Kush po e mban peng restaurimin e shtëpisë-muze të poetit Gjergj Fishta?