Viktima e parë shqiptare nga koronavirusi është regjistruar në Itali, ka konfirmuar konsullja shqiptare në Milano, Anila Pojani.
Në një intervistë në News 24, ajo tha se një grua 60-vjeçare nga Shqipëria që jetonte në Itali ka ndërruar jetë pas një arresti kardiak ndërkohë që ka qenë e prekur me koronavirus.
Konsullja bën me dije familjarët e të ndjerës nga Durrësit janë futur në karantinë në shtëpitë e tyre.
“Jemi kontaktuar nga një agjenci funebre dhe sot nga shqyrtimi i dokumentacionit përkatës kemi konstatuar që qytetarja nga Durrësi ka ndërruar jetë nga një arrest kardio-respirator dhe ka rezultuar e prekur nga koronavirusi. Familjarët e saj janë futur në karantinë në banesat përkatëse.
Ashtu siç iu komunikova dokumentacioni i zonjës ka mbërritur sot në konsullatë dhe duke pasur parasysh situatën dhe familjarët e zonjës, djali, vajza dhe bashkëshorti janë në karantinë. Duhet zbatuar vendimi i kryeministrit italian për ceremonitë mortore dhe trupi ndodhet në morgun e spitali. Dokumentacioni lëshohet shumë shpejt dhe familjarët mund ta tërheqin sapo të dalin nga karantina”, tha konsullja. /Opinion.al
