Haxhi Çollaku, 55-vjeç nga Shqipëria është vrarë nga policia në Italiane, pasi nuk i është bindur urdhrit të policisë si dhe ka tentuar të shtypë karabinierët me furgon.
Mësohet se ai ishte denoncuar për përndjekje nga ish-bashkëshortja. Mediat vendase raportojnë se në momentin e ngjarjes viktima ndodhej në hyrje të shtëpisë së ish-gruas së tij, në lagjen Sacra Famiglia.
Efektivët e policisë i kërkuan të largohej, pasi për ish-bashkëshorten kishte urdhër mbrojtje në fuqi, që e ndalonte 55-vjeçarin të afrohej në zonë.
Në fillim u duk sikur ai hoqi dorë dhe u largua drejt furgonit të tij, duke pritur që karabinierët të përfundonin marrjen e të dhënave personale dhe përgatitjen e raportit për ngjarjen.
Më pas ka ndezur makinën duke goditur karabinieren përballë tij, e cila ngeci e plagosur mes furgonit dhe makinës së shërbimit.
Pasi doli nga furgoni, Çollaku tentoi të godiste më thikë policen. Në këtë moment kolegu i kësaj të fundit ka nxjerrë pistoletën dhe ka qëlluar në drejtim të shqiptarit katër herë.
Viktima ka marrë dy plumba në trup dhe dy në këmbë. Raportohet se ai ndërroi jetë në spitalin e Padovës, ku mbërriti në gjendje të rëndë.
Policja 40-vjeçare e goditur prej tij me furgon, raportohet se ka pësuar lëndime në disa pjesë të trupit dhe ka thyer këmbët. Ajo ndodhet e shtruar në spital, por gjendja për momentin nuk paraqitet e rëndë.
