Me 2 102 orë pune në vit, shqiptarët punojnë më shumë se amerikanët, gjermanët, francezët por janë më të keqpaguarit në Europë e më gjerë.
Për shumëkënd në Shqipëri është normale të punojë pas orarit të punës edhe pse mund të mos paguhet. Të qëndrojë në ambiente tregtare për mbi 10 orë, ose dy turne radhazi, apo dita e punës të fillojë në 9 të mëngjesit e të përfundojë pas orës 9 të mbrëmjes (në median e shkruar).
Nuk është e ulët as koha që një punonjës mund të kalojë në kafe gjatë orarit të punës, apo duke lundruar në rrjetet sociale, ndërsa vendi nuk shquhet për produktivitet të lartë.
Të dhënat e INSTAT (të publikuara në 2015-n, në bazë të një anketimi të kryer në 2013) tregojnë se Shqipëria ka ndër orët më të gjata të punës në botë, me 2 102 orë/vit.
Nga të dhëna krahasuese rezulton se nga vendet e zhvilluara të OECD, vetëm Meksika dhe Koreja kanë orë më të gjata pune se Shqipëria, me përkatësisht 2, 237 dhe 2,163 orë në vit.
Edhe në raport me vendet e rajonit, shqiptarët kanë orë më të gjata pune, ku për shembull në Maqedoni, statistikat zyrtare tregojnë se janë 1, 875 orë pune ne vit.
Sipas vrojtimit të INSTAT, të gjithë sektorët në Shqipëri kanë raportuar mbi 2 000 orë pune në vit, ku rekordin e mbajnë Informacioni dhe Komunikacioni, (2 132); Tregtia me shumicë dhe pakicë (2,171); Industria përpunuese (2, 126); Akomodimi dhe aktivitetet e shërbimit të ushqimit (2 128).
Pagat
Ndërsa ka orët më të gjata të punës, Shqipëria ka pagën minimale më të ulët mes vendeve të Bashkimit Europian dhe atyre kandidate, jo vetëm në vlerë absolute, por edhe e matur nga standardet e fuqisë blerëse.
Koço Broka, ekonomist, pohon se ka ardhur koha të mendohet seriozishit për rritjen e produktivitetit të punës dhe të shqyrtohen arsyet se pse kemi rendimentin më të ulët në Europë. “Kështu ka qenë edhe para një shekulli keshtu ndodh dhe sot. Popujt ecin përparojnë. Duhet t’ia kërkojmë vetes rritjen e produktivitetit të punës për rrjedhoje rritjen reale të pagës mesatare e minimale”, tha ai. /monitor/
