“Nëse ecën këto ditë rrugëve të Tiranës, është e pamundur të mos vësh re mozaikun e gjuhëve që dëgjohen, nga anglishtja në italisht, gjermanisht, frëngjisht e deri në kinezçe. Shqipëria po bëhet një destinacion gjithnjë e më shumë ndërkombëtar, ku mbizotërojnë flukset nga Europa”, raporton gazetarja e Tv Klan, Dorina Halili.
Ndërsa hyrjet nga Kosova vazhdojnë të kryesojnë, italianët mbeten të dytët si grupi me fluksin më të lartë të hyrjeve në Shqipëri.
Të dhënat e Ministrisë së Turizmit tregojnë se në 4 muaj në vendin tonë kanë ardhur mbi 301 mijë italianë, 7% më shumë sesa në po të njëjtën periudhë vitin e kaluar.
Për këtë vit, shtimet më të mëdha në përqindje vijnë nga tregje më pak tradicionale si Finlanda, Izraeli dhe India, duke reflektuar kështu një rritje të interesit edhe nga tregjet e largëta.
“Është një nga vendet ku nuk kam qenë ndonjëherë më parë, është shumë bukur, njerëzit janë miqësorë dhe ushqimi është i shkëlqyer”, thotë një turist.
“Do t’ua sugjeroja të tjerëve që të vijnë ta shohin Shqipërinë për pushime, kemi ardhur nga Britania”, shprehet një tjetër.
“Çmimet janë të drejta, nisur nga ushqimi dhe deri tek ato që shohim në supermarkete”, shton një tjetër.
Rritje të konsiderueshme kanë shënuar edhe hyrjet nga Austria, Gjermania dhe Franca, specifikisht me 48%, 41% dhe 40%.
“Shqipëria është destinacioni i vitit në Francë, jemi shumë të lumtur që jemi këtu”, thotë një turist.
“Besoja se gjërat nuk ishin dhe aq mirë këtu në Shqipëri, por tani që i shoh, mendoj se janë shumë më mirë nga sa mendoja. Jam nga Greqia”, vijon një tjetër.
“Prindërit e mi kanë qenë këtu para dy vitesh dhe më treguan që ishte shumë bukur, kështu që doja ta shihja edhe unë”, vijon një tjetër turist.
Sakaq, ajo që bie në sy këtë vit është rënia e vizitorëve nga Kosova me 7%, nga 894 mijë që pati vitin e kaluar në 834 mijë këtë 4-mujor të parë.
Tv Klan
