Pas dëbimit të dy diplomatëve iranianë, ekspertët shohin një rrezik të shtuar për sigurinë në Shqipëri.
Sipas tyre ka një kërcënim gjithmonë e më të prekshëm nga regjimi i Iranit, ku më i mundshëm është ai i sulmeve të izoluara kibernetike apo terroriste, ku Irani ka kapacitete të konsoliduara dhe të testuara.
Ekspertët raportojnë për DW se këto sulme mund të ndërmerren në territorin shqiptar, por edhe në vendet ku Shqipëria ka trupa me misione ushtarake, në veçanti në Lindjen e Mesme apo Azinë Qendrore.
Ky kërcënim dhe acarim i vazhdueshëm i marrëdhënieve mes Iranit dhe vendit tonë nuk vjen vetëm nga dëbimi i diplomatëve iranianë por dhe nga prania e rreth 3 mijë muxhahedinëve disidentë në Shqipëri.
Ata janë anëtarë të Organizatës Popullore të Muxhahedinëve të Iranit, të njohur me inicialet MEK (Mojahedin-e-Khalq), opozita politike e regjimit klerik të Iranit. Zhvendosja e tyre në Shqipëri, nga bazat amerikane në Irak, ku u rrezikohej jeta nga sulmet me raketa të qeverisë iraniane, është bërë në bazë të një marrëveshjeje mes qeverisë amerikane dhe asaj shqiptare, të nënshkruar në vitin 2013.
Irani e konsideron MEK një organizate terroriste, gjë që sjell rrjedhimisht një rrezik të shtuar prej regjimit të Iranit kundër sigurisë kombëtare të Shqipërisë.
Vetëm pak ditë më parë, lideri suprem i republikës islamike, Ali Khamenei, drejtoi gishtin ndaj Shqipërisë, duke iu referuar si “një vend i vogël, por i djallëzuar evropian, ku elementët amerikanë komplotojnë me tradhtarët iranianë dhe planifikojnë sulme kundër Republikës Islamike”./Opinion.al
