Shqipëria akuzon Belgjikën për vonesën në arrestimin e Safet Rustemi (Bajri). “Klani i tij mund të kryejë vrasje”, citohet të ketë thënë zv/ministri ynë i Brendshëm Besfort Lamallari për median belge “nieuwsblad.be”.
Në një shkrim të gjatë, kjo gazetë online vë përballë zv/ministrin tonë të Brendshëm me ministrin e tyre të Drejtësisë Koen Geens. Teksa Lamallari thotë se “Shqipëria ka pritur 5 muaj që Belgjika të sjellë dosjen e dënimit të Safet Bajrit, ministri belg ka thënë se “autoritetet në Belgjikë kanë bërë një gabim njerëzor, kur kanë vendosur për dëbimin e tij”. Ndërsa pretendimeve tës palës shqiptare për vonesa proceduariale të Belgjikës, ministri belg jep këtë përgjigje. “Shqipëria është në një betejë të ashpër mes shumicës dhe opozitës rreth korrupsionit”.
Shkrimi i plotë i medias belge:
Sipas qeverisë shqiptare, Belgjika ka marrë pesë muaj kohë për të sqaruar statusin e kriminelit të shumëkërkuar Safet Rustemi. Ndërkohë, klani i tij mund të “kryente krime të rënda, përfshirë vrasjet”, ka thënë zyrtari shqiptar Besfort Lamallari.
Policia shqiptare thotë se ka kryer hetime për disa muaj me përgjime dhe dron për klanin e Safet Rustemit që në Shqipëri njhet si “Bajri”. Krimineli i kërkuar nga Belgjika – së bashku me dhjetë anëtarë të tjerë të bandës u arrestuan në kryeqytetin shqiptar, Tiranë, të premten e kaluar.
Për ministrin e Drejtësisë Koen GEENS, rasti-Rustemi terhoqi vemendje këtë vere pasi Departamenti i Emigracionit evidentoi se është deportuar një person i rrezikshëm i dënuar me 22 vite në burg për trafikim të drogës dhe krime të dhunshme. Geens tha se arrestimi erdhi falë “bashkëpunimit shumë të mirë me Shqipërinë për marrjen e dënimit dhe arrestimin e shtetasve shqiptarë të dënuar në Belgjikë”.
Më tej ai ka sqaruar se Rustemi nuk mund të ekstradohet pasi nuk kemi marrëveshje ekstradimi, por mund të vuajë në Shqipëri dënimin e dhënë nga gjykata belge.
“Autoritetet shqiptare kanë kërkuar disa herë që nga prilli 2018 për vendimin e gjykatës,” thotë zëvendësministri i Punëve të Brendshme, Besfort Lamallari. Më tej ai ka thënë se “e kemi marrë vendimin në shtator 2018 “.
Sven Mary, avokati i Rustemit, gjithashtu bën pyetje rreth interpretimit të Geens: “Kam përshtypjen se bashkëpunimi nuk ishte i suksesshëm, madje ishte bashkëpunim i ngurtë.
Vrasjet në Shqipëri
Sipas autoriteteve shqiptare, ata mund të kishin parandaluar krime të rënda nëse Belgjika do kishte reaguar më shpejt. Rustemi dhe shokët e tij tani akuzohen në Shqipëri për vrasje, posedim të paligjshëm të armëve, pastrim parash, gjobvënie dhe trafik droge.
Avokati belg i Rustemit thotë se ministri Geens gabon kur thotë se Safet Rustemi do vuajë dënimin në Shqipëri pasi në Belgjikë është dënuar në mungesë. “Klienti im, si çdo qytetar tjetër, ka mundësinë të kundërshtojë këtë vendim. Kjo do të thotë se këto ndëshkime nuk janë definitive dhe proceset do të duhet të rishikohen. Pa praninë e tij s’mund të dënohet në Belgjikë. Nëse ai nuk ekstradohet për tu rihapur procesi, ky përbën një problem”, thotë avokati i tij.
Përshtati: Opinion.al
