Bashkia e Vlorës me anë të një njoftimi ka lajmëruar qytetarët të mos afrohen në zonën përballë teatrit “Petro Marko”, të shtunë në orën 13:00.
Në këtë zonë do ketë një shpërthim me tritol për të rrëzuar pallatin 4-katë në Vlorë tek “Tre Racat”.
Banorët e kësaj zone duhet të marrin një sërë masash që të shmangin dëmet në banesat e tyre, të hapin dritaret, të ulin në dysheme pajisjet si televizor apo orendi të tjera shtëpiake.
Më herët IKMT i dorëzoi pronarit vendimin e shembjes, ndërsa nisën edhe çmontimin e skelave dhe ambienteve të tjera, për t’i hapur rrugë shembjes me shpërthim.
Këshilli i Ministrave ka nxjerrë nje vendim për shpronësimin e tij me një vlerë të konsiderueshme, me rreth 600 mijë euro. Pritet që kjo zonë të kthehet në lulishte ashtu siç kishte paralajmëruar më herët kryeministri Rama.
