Një 55-vjeçar ka rënë në prangat e Policisë së Fierit, pasi akuzohet se shpërndante lëndë narkotike.
Sipas autoriteteve, gjatë kontrollit të ushtruar në makinën e 55-vjeçarit të identifikuar me inicialet G.M., u sekuestruan 5 doza kokainë.
Arrestimi i 55-vjeçarit është bërë pas informacioneve të marra në rrugë operative, ndërkohë mbi të arrestuarin rëndon akuza “Prodhimi dhe shitja e narkotikëve”.
Njoftimi i policisë
Policia e Fierit godet një tjetër rast të shpërndarjes së drogave të forta në formë dozash.
Sekuestrohen 5 doza Kokainë, arrestohet në flagrancë poseduesi i tyre.
Specialistët e Seksionit për Hetimin e Narkotikëve në Drejtorinë Vendore të Policisë Fier arrestuan në flagrancë shtetasin:
G.M, 55 vjeç, banues në Levan, Fier.
Në bazë të informacioneve të siguruara në rrugë operative, në vendin e quajtur “QTU”, Fier, nga kontrolli i ushtruar në automjetin tip “Ford” që drejtohej nga shtetasi G.M, u gjet një pako si ajo e ilaçeve ku brenda së cilës kishte pesë paketime në formë dozash me lëndë narkotike të dyshuar Kokainë, e cila u sekuestrua në cilësinë e provës materiale.
Materialet i kaluan Prokurorisë pranë Gjykatës së Shkallës së Parë Fier për veprën penale “Prodhimi dhe shitja e narkotikëve”./ Opinion.al
