Rreth 18 shërbyes civilë në Komunën e Prishtinës gjatë vitit të kaluar ishin larguar pa të drejtë nga puna.
Mirëpo të njëjtit në bazë të një vendimi të Këshillit të Pavarur Mbikëqyrës të Shërbimit Civil, ishin kthyer në punë, pas ankesave që ata kishin bërë lidhur me vendimin e kryetarit Shpend Ahmeti, shkruan Gazeta Express.
Zyra e Auditorit të Përgjithshëm në raportin e saj ka gjetur se ky largim i këtyre 18 shërbyesve civilë ishte bërë pa bazë të arsyetueshme ligjore. Këto veprime Ahmetit i kishin kushtuar për kompensim retroaktiv të pagave për këta punonjës prej 37 mijë e 427 euro.
“Largimi nga puna i punëtorëve në mënyrë arbitrare, mund të rezultojë me çrregullime të buxhetit për paga, duke shkaktuar pagesa të njëhershme dhe shpenzime shtesë për mbulimin e këtyre pozitave”, thuhet në raportin e ZAP’it.
Ky i fundit i rekomandon kreut të Prishtinës se me rastin e vendimmarrjes, lidhur me shkeljet e detyrave të punës nga ana e stafit, kryetari të sigurojë se janë zbatuar të gjitha procedurat e duhura dhe vendimmarrja është në përputhje të plotë me ligjet në fuqi./GazetaExpress/
