Aktorja Shrenu Parikh sapo ka bërë debutimin e saj në serialin “Bixhoz me Dashurinë”. Personazhi i saj, Gori po detyrohet të martohet me një burrë që nuk dashuron. Kjo nuk është hera e parë që në një serial indian trajtohen tema të tilla sociale, me një ndjeshmëri tepër të lartë por që për fat të keq janë pjesë e realitetit tonë. Bëhet fjalë për abuzimin seksual. Aktorja ka vendosur që përmes Instagramit të bëjë një rrëfim shokues, që sikurse ajo tregon bëhet fjalë për diçka që ka lënë shenja të thella në jetën e saj.
Shrenu tregon se kur ishte fëmijë persona të njohur e kanë prekur në vende të papërshtatshme dhe synimi i saj duke bërë publike këtë histori është të nxisë fansat që të mos qëndrojnë të heshtur, por të flasin dhe të denoncojnë raste të tilla.
Ja historia që ka treguar aktorja Shrenu Parikh: “Kur isha fëmijë pushimet zakonisht i kaloja tek gjyshërit në një qytet tjetër. Në atë kohë udhëtoja me autobus. Kur nuk kishte vend bosh, gjyshi i kërkonte ndokujt rastësisht që të ulesha me të. Në të njëjtën mënyrë, njëherë një xhaxhi i tha gjyshit se mund të ulesha në prehrin e tij. Ndonëse unë nuk doja, pasi nuk isha e lodhur, gjyshi më detyroi që të ulesha tek zotëria. Si fëmijë nuk mund ta dija se çfarë mund të ndodhte. Më kishte zënë gjumi nga rruga e gjatë dhe zgjohem vetëm nga ndjesia që dikush po më prekte dhe nuk po më dukej normale. E ndjeja që diçka nuk ishte në rregull, por gjithsesi ngela si e mpirë dhe i thashë vetes që nuk ka asnjë problem, “ ai thjesht po më mban”, mendoja me vete. E shikoja gjyshin që qëndronte pak më larg, por nuk munda ti thoja asgjë, as në atë moment dhe as më vonë. Sa do të doja të kisha folur për këtë gjë, sa do të doja që i njeri të merrte ndëshkimin që meriton për faktin që ngacmoi një vajzë 6 vjeçare. Kjo nuk është diçka që ka ndodhur vetëm një herë, sa e sa herë përsëriten raste të tilla. Njoh plot shoqe që kanë kaluar të njëjtën gjë dhe kurrë nuk kanë gjetur guximin të flasin për këtë. Nuk e ngrejmë kurrë zërin, pasi kemi frikë se shoqëria nuk do të na besojë dhe nuk luftojmë për veten tonë. Atë që po kalon Gori besoj se është diçka që secila prej nesh e ka kaluar në një moment të caktuar të jetës. Prandaj jam shumë e lumtur që e kemi trajtuar këtë gjë në serial, në mënyrë që femrat të gjejnë forcën e guximin dhe të tregojnë e të flasin. Nëse ne nuk pranojmë të vërtetën tonë, atëherë askush tjetër nuk do ta bëjë. Kjo është thjesht një përpjekje e vogël për të krijuar hapësirën dhe mundësinë që të gjitha të ndajmë historitë tona dhe të ngrejmë zërin.”
Shpresojmë shumë që postimi i Shrenu të inspirojë shumë njerëz që të flasin e të ngrejnë zëri ndaj këtyre veprimeve të tmerrshme. Ju çfarë mendoni për këtë histori të aktores? E tmerrshme, apo jo?
