Nuk ka një diskutim për shkurtim të pagave të administratës dhe pensioneve. Kështu u shpreh në Opinion, Ministrja e Financave dhe Ekonomisë Anila Denaj, e pyetur nga gazetarja Aurora Sulçe, lidhur me një propozim të deputetit socialist Ilir Beqja.
“Nuk ka një diskutim të tillë, çdo deputet është i lirë të bëjë propozimet e tij. Ne do të ishim shumë të kujdesshëm të preknim pagat. Çka është duke u menduar, është trajtimi që do të shohim për gjatë gjithë kohës jo vetëm për këto muaj, sepse adminisrtata publike do të ridimensionojë edhe pjesën e punës nga shtëpia. Nuk ka një diskutim konkret për të thënë që kjo është një alternativë. Në fund të majit dhe në fillim të qershorit grupi i punës do të shohë ku jemi në raport me të ardhurat dhe do të shohim shpenzimet. Nëse marrim hierarkinë e shpenzimeve kjo nuk do të ishte e para, madje do të ishte e fundit”, tha Denaj./Opinion.al
