Mrdjan Bajiç, skulptor serb, në një shkrim mbi librin e Edi Ramës “Kurbani” të përkthyer në gjuhën serbe, rrëfen se si e njohu Kremastarin e Shqipërisë në vitet 90-të në Paris.
Bajiç pasi flet për librin që erdhi pas humbjes së zgjedhjeve për Bashkinë e Tiranës, ai shton se nuk kishte moment më të mirë për Ramën se sa ky që të ulej dhe të shkruante.
“Në fund të çdo humbjeje qëndron forca për të ecur përpara si i vetmi shpëtim dhe atëherë humbja nis të punojë kundër vetvetes”, shkruan ai.
Skulptori serb thekson se Rama ka zbatuar formulën e ekzistencialistëve francezë kur ishte student në Paris.
Bajiç gjithashtu mes të tjerave nënvizon se Rama në libër shkruan dhe për ata që fillimisht ishin miqtë e tij në politikë, Fatos Nanon dhe Ilir Metën dhe që më pas u kthyen në kundërshtarë.
Gjithashtu, Bajiç thotë se Rama i përmend serbët në libër tri herë: Klani i Zemunit, Arkani dhe stili i Millosheviçit.
Artisti serb më pas tregon dhe se si Rama shkaktoi mjaft debat me një shkrim të botuar shumë vite më parë në mediat shqiptare me titull: “Armët e mikut tim serb”.
“U publikua në vitet 1990 në një nga gazetat më të lexuara shqiptare dhe që i shkaktoi atij shumë probleme dhe marrje në pyetje”, shkruan Bajiç.
