Një nga kandidatët për anëtar në Gjykatën Kushtetuese nuk është konfirmuar në detyrë nga Komisioni i Pavarur i Kualifikimit. Ilir Mustafaj, aktualisht gjyqtar i Gjykatës së rrethit Tiranë, nuk e ka kaluar vettingun për shkak të problemeve me justifikimin e pasurisë.
Trupa gjykuese e KPK që hetoi Mustafajn përbëhej nga Lulzim Hamitaj kryesues, Xhensila Pine Relatore dhe Valbona Sanxhaktari anëtare. Gjyqtari Mustafaj kishte kërkuar më herët përjashtimin e relatores Xhensila Pine nga trupa e KPK por kjo kërkesë ishte rrezuar.
Relatorja Xhensila Pine, tha se nga hetimi i komisionit janë gjetur disa probleme në deklarimet e pasurisë së gjyqtarit Ilir Mustafaj. Lidhur me apartamentin 121 metra katrorë në Tiranë, Mustafaj ka deklaruar si burim krijimi një kredi bankare marrë në 2006, në vlerën 40 mijë euro dhe 7 mijë euro detyrim personave të tretë. Pine tha se nga krahasimi i deklarimeve periodike me atë vetting dhe prej dokumentacionit të siguruar nga Komisioni gjatë hetimit administrativ janë konstatuar mospërputhje lidhur me mënyrën e përfitimit të kësaj pasurie..
Komisioni ngriti dyshime edhe sa i përket kontratës së sipërmarrjes në vitin 2011, duke vënë në dukje se për truallin 332 m2 në pronësi të familjarëve të gjyqtarit Mustafaj, ata përfitonin si kompesim 105% sipërfaqes që kishin në zotërim. “Sipërfaqja e përfituar rezulton se është në vlerën 787 m2 ose 76% e ndërtimit”, tha relatorja Pine.
Komisioni ka gjetur mospërputhje edhe mes dy vërtetimeve bashkëngjitur deklaratës vetting për tokën bujqësore në Ersekë me sipërfaqe 27 mijë m2 të përfituar nga Ligji “Për Tokën”.
Nga ana tjetër Komisioni i Pavarur i Kualifikimit ka konfirmuar në detyrë Prokuroren e Prokurorisë së Rrethit Gjyqësor Tiranë, Elida Kaçkini.
Dy ditë më parë, ku dhe u zhvillua seanca dëgjimore për Kaçkinin, u vu në dukje se pasuritë e saj rezultonin siç ishin deklaruar. Qëndrim të njëjtë KPK pati edhe për sa i përket pastërtisë së figurës dhe profesionalizimit.
Prokurorja është edhe kandidate për në SPAK. Në momentet e rikonfirmimit, miq dhe të afërm kanë shpërthyer në lot gëzimi./ Opinion.al
