Është arrestuar një 36-vjeçar në Korçë pasi në banesën e tij u gjetën dhjetëra doza heroinë, të bëra gati për shitje. Në pranga ka rënë shtetasi E.S., pas informacioneve se ky person ushtronte veprimtarinë e paligjshme të prodhimit e shitjes së narkotikëve.
Sipas policisë, është lokalizuar automjeti i tip “Audi” me të cilin po lëvizte 36-vjeçari dhe gjatë verifikimit të kryer rezultoi se ai e drejtonte makinën pa leje drejtimi.
Në vijim të veprimeve procedurale, gjatë kontrollit të ushtruar në banesën e tij, u gjet një sasi lënde e dyshuar narkotike heroinë, e ndarë në dhjetëra doza, që dyshohet se sigurohej nga ky shtetas, me qëllim shitjen.
Sasia e lëndës narkotike u sekuestrua në cilësinë e provës materiale, së bashku me automjetin me të cilin dyshohet se shpërndante heroinë dhe 2 celularë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme./Opinion.al
