Një 35-vjeçar, banues në Tiranë është arrestuar nga policia pasi kontrabandonte medikamente mjekësore. Shtetasi me iniciale A.M. i reklamonte dhe i shiste online këto medikamente që i mbante në banesën e tij.
Policia ka ushtruar kontroll në makinën e tij dhe ka gjetur si provë materiale sasi të konsiderueshme medikamentesh mjekësore.
Këto materiale i kanë kaluar prokurorisë, për veprime të mëtejshme procedurale.
Njoftimi i policisë:
Finalizohet nga Seksioni për Hetimin e Krimeve Ekonomike dhe Financiare, operacioni policor i koduar “Medicines 2”.
Shiste online medikamente mjekësore të kontrabanduara që i mbante në banesë, vihet në pranga 35-vjeçari.
Sekuestrohen medikamente të ndryshme mjekësore, të dyshuara të kontrabanduara.
Specialistët e Seksionit për Hetimin e Krimeve Ekonomike dhe Financiare, në DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës me mallra, bazuar dhe në informacionet e siguruara nga inteligjenca informative, për një shtetas që mbante në banesën e tij, sasi të konsiderueshme medikamentesh mjekësore, të dyshuara të kontrabanduara, organizuan dhe finalizuan operacionin policor të koduar “Medicines 2”.
Si rezultat i këtij operacioni u bë arrestimi në flagrancë i shtetasit:
– A. M., 35 vjeç, banues në Tiranë, për veprat penale “Tregtimi dhe transportimi i mallrave që janë kontrabandë”, “Ruajtja apo depozitimi i mallrave që janë kontrabandë” dhe “Fshehja e të ardhurave”.
Gjatë kontrollit të ushtruar në automjetin dhe në banesën e shtetasit A. M., në rrugën “Irfan Tomini”, shërbimet e Policisë gjetën dhe sekuestruan, në cilësinë e provës materiale, sasi të konsiderueshme medikamentesh mjekësore, të dyshuara të kontrabanduara, të cilat 35-vjeçari i reklamonte dhe i tregtonte nëpërmjet faqeve online në rrjete sociale.
Në cilësinë e provës materiale u sekuestruan medikamente të ndryshme mjekësore, të dyshuara të kontrabanduara./Opinion.al
