Ministri i Turizmit dhe Mjedisit Blendi Klosi në një konferencë për mediat, ka thënë se është propozuar pezullimi i 12 guroreve në zonën e mbrojtur Krastë-Vrion, të cilat shfrytëzonin malin e Krujës prej rreth 30 vitesh.
Klosi tha se pas një hetimi të gjatë, task-forca e ngritur nga katër ministri, arriti në konkluzionin se duhen revokuar lejet e 12 guroreve.
“Sot jemi këtu për të deklaruar përfundimin e kontrollit masiv që u kemi bërë guroreve në zonën Krastë- Vrion. Zona për 30 vjet është shfrytëzuar jashtë çdo standardi. Të zhbësh dëmet e shkaktuara të mjedisit është një sipërmarrje e madhe, por jo e pamundur. Grupi i punës i ka propozuar katër ministrave masën e revokimit për 12 subjektet që ushtronin aktivitetet në malin e Krujës”, tha Klosi.
Ai gjithashtu deklaroi se do të bëhet verifikimi i dokumentacionit për të gjitha guroret që zhvillojnë aktivitetin në Shqipëri./Opinion.al
