Gjykata e Tiranës ka dhënë masën e sigurisë “Arrest në burg” për mjekun kardiokirurg Dervish Hasi, i cili akuzohet se ka shfrytëzuar një të mitur për prostitucion.
Ai u arrestua dy ditë më parë për shfrytëzim të një vajze të mitur, 16 vjeçe dhe akuzat që rëndojnë mbi të janë trafikim i të miturve dhe pornografi.
42-vjeçari u vu në pranga pas informacioneve të siguruara në rrugë operative dhe mbajtjes në vëzhgim të tij prej disa ditësh nga ku ka rezultuar se e mitura është shfrytëzuar prej tij për prostitucion për një periudhë 2-vjeçare.
Pas arrestimit të mjekut 42-vjeçar uniformat blu sekuestruan edhe celularin ku në të janë gjetur filmime me përmbajtje erotike të 3 grave të Dervish Hasit, por edhe të vajzës 16-vjeçare.
Asnjë nga gratë e tij nuk ka pranuar të flasë para hetuesve dhe nuk kanë treguar asgjë në lidhje me ngjarjen para policisë. Edhe vetë 42-vjeçari Hasi, në pjesën më të madhe të pyetjeve të policisë është shprehur me “po” ose “jo”, duke mos dhënë detaje të plota për ngjarjen edhe pse ka thënë se vajzën nuk e ka detyruar njeri.
16-vjeçarja prezantohej nga Hasi si gruaja e tij të katërt. Familjarët e vajzës janë shprehur se në fillim kanë qenë pjesërisht dakord dhe nuk kishin zgjidhje tjetër për shkak se vajza ishte e bindur nga Hasi dhe, siç thanë ata, “kishim frikën e ndonjë veprimi nga ana e saj”.
