Muzikali i kompozuar nga gjermani Carl Orff në vitin 1936, “Carmina Burana” vjen për publikun në skenën e Teatrit Kombëtar të Operës dhe Baletit në ditët e fundit të këtij viti.
Për tre mbrëmje, në datat 28, 29 dhe 30 Dhjetor ora 19.00 do të rivihet në skenë një nga veprat, që tashmë ka marrë vlerësime jo vetëm në skenën shqiptare, por dhe atë të huaj.
Kjo vepër, e konsideruar si një ndër klasikët e parë në historinë e muzikës, sjell në skenë rreth 250 artistë, ku përfshihet trupa e baletit, solistë, kori dhe Orkestra e TKOB. Orkestra do të drejtohet nga Elda Laro, artistja e talentuar, e cila nga Janari i 2016 do të jetë dirigjente e dytë në Deutsche Oper të Berlinit.
“Pas suksesit që pati në Tetor të po këtij viti, menduam ta ofrojmë sërish për publikun tonë në këto ditë festash, këtë produksion madhështor, i cili përveç muzikës së mrekulleshme të Carl Orff, sjell gjithashtu një koreografi, e cila është një “himn për dashurinë e sinqertë” siç shprehet edhe krijuesi i saj Youri Vamos”, thuhet në njoftimin e teatrit mbi këtë vepër, që pritet të jetë në skenë për 3 netë me radhë.
Vepra që vjen në skenë në ditët e fundit të vitit, është vlerësuar jo pak dhe nga vetë titullari i Teatrit të Operës dhe Baletit, Ilir Kerni. Që në kohën që u prezantua se kjo vepër do të jetë në skenë para pak ditësh, drejtori Kerni e cilëson këtë produksion të teatri shqiptar si një vepër të skenave evropiane.Images
“2015 meriton një mbyllje madhështore. “Carmina Burana” vepër e skenave evropiane. Carl Orff +Youri Vamos”, shkruan drejtori Ilir Kerni mbi këtë vepër, që mbrëmjes e së hënës është në skenë për publikun. “Carmina Burana” është brilante në gjithë thjeshtësinë që e karakterizon, ritmikisht potent, me një tematikë gjithnjë aktuale, ky balet të zgjon fantazinë si asnjë vepër tjetër e shekullit të 20-të.
Këtij pushteti sugjestionues që përcjell muzika e Orff, koreografi Vamos i përgjigjet me një skenografi veçanërisht të thjeshtë. Vetë skena kornizohet nga siluetat e korit dhe orkestrës. Nën këtë sfond dhe nëpërmjet një koreografie mbresëlënëse ai shpalos një himn ngazëllyes për dashurinë e sinqertë.
“Carmina Burana” është parë si një eksperiencë, e cila s’do të mund të ç’rrënjoset me lehtësi nga kujtesa, një vepër që ka lënë pa fjalë audienca për 20 vite. /ata/
