Shfaqet Ismailaj: Nuk tërhiqem nga arbitrazhi me CEZ

TIRANE- Biznesmeni Kastriot Ismailaj ka folur në Gjykatën e Krimeve të Rënda ku po shqyrtohet kërkesa e prokurorisë për konfiskimin e 5 milionë eurove, pasi dyshohet se janë vendosur nga aktivitet kriminal. Sipas biznesmenit që mbahet nën arrest këto para janë vendosur në mënyrë të ligjshme dhe përpara vitit 2010 dhe jo siç pretendojnë hetuesit se janë fituar pas këtij viti dhe mund të hetohen nga ligji antimafia. Ismailaj ka thënë para togave të zeza se 5 milionë eurot janë fryt i punës së tij dhe bizneseve të ngritrua jashtë vendit. Këto para, – tha biznesmeni i ka transferuar nëpërmjet bankave dhe jo me çanta. Sipas tij të gjitha tranaksionet janë të ligjshme dhe për vite me radhë asnjë bankë prestigjioze nuk ia ka bllokuar. 52-vjeçari i ka kujtuar gjykatës se është hetuar dhe dy herë të tjera nga prokuroria shqiptare dhe në të dy rastet hetimet janë pushuar, pasi nuk janë gjetur prova. Ismailaj tha para gjykatës se hetimet nisën vetëm pas hapjes së procedurave të kompanisë së tij DIA në arbitrazh kundër CEZ. Ai garantoi se do të vazhdojë procesin dhe në një mënyrë apo në një tjetër do ti gjejë paratë për të vazhduar. Pas këtyre deklaratave avokati mrbojtës Vladimir Meçe i dorëzoi gjykatës dy vendimet e pushimit të prokurorisë së Tiranës. Ndërkohë që gjykata pritet të vendosë në seancat e ardhshme nëse do të ketë konfiskim të 5 milion eurove të Ismailaj.