Një sherr masiv me thika ka ndodhur në mesnatë në fshatin turistik të Borshit në Sarandë. Për pasojë ka humbur jetën Premtim Bega 31 vjeç banues në këtë fshat si dhe është në gjendje të rëndë 24 vjeçari me iniciale E.O.
Nga të dhënat paraprake dyshohet se të rinjtë janë përfshirë në një sherr në një lokal dhe më pas janë ndarë. Por grupi i 20 vjeçarëve nga Vlora disa minuta më pas u ka dalë përpara djemve nga Borshi duke i masakruar me thika. Ende nuk dihen motivet e sakta të këtij sherri masiv mes 7 të rinjve. Policia paraprakisht tha se është për motive banale.
Sakaq një banor i zonës shprehet: “Unë nuk e di për çfarë janë zënë. Thuhet se mbas sherrit që nuk e di ku nisi, njëri nga grupet i ka bërë pritë në rrugë dhe i kanë goditur ata të grupit tjetër. I kanë bërë copa me thika. Këtu kanë marrë goditjen e fundit, tek rruga që të çon për në plazh”.
Ai thekson faktin se ambulanca u vonua shumë për t’u dhënë ndihmën e parë të plagosurve.
Policia në një njoftim për mediat deklaron se i ka gjetur të plagosur në rrugën kryesore të Borshit pas një telefonate që ka marrë në sallën operative rreth orës 00:40 të ditës së sotme.
Premtim Bega, 31 vjeç, banues në Borsh ka ndërruar jetë gjatë transportimit për në Qendrën Shëndetësore.
Ndërsa E.O., 24 vjeç, banues në Borsh, ndodhet në gjendje të rëndë shëndetësore në spital.
Po kështu të plagosur, por jashtë rrezikut për jetën janë D.K., 24 vjeç, banues në Borsh E.M, 23 vjeç, banues në Borsh.
Policia ka arrestuar në flagrancë njërin prej autorëve të dyshuar, R.Sh., 19 vjeç nga Vlora. Janë shpallur në kërkim dy prej autorëve të tjerë të dyshuar N.H.20 vjeç
dhe Xh.M. Vijon puna për zbardhjen e plotë të rrethanave të ngjarjes si dhe për kapjen e ndalimin e dy autorëve të shpallur në kërkim. Materialet do t’i kalojnë Prokurorisë së Rrethit Gjyqësor Sarandë për veprat penale parashikuar nga nenet 79 /dh, 22 dhe 25 të Kodit Penal, thuhet në njoftimin e policisë.
*Në foto viktima
*Pamje nga arrestimi i 19 vjeçarit
