Detaje të reja janë zbardhur në lidhje me plagosjen e një 27-vjeçari në Lezhë ditën e shtunë.
Ngjarja e ndodhur rreth orës 11:05, në afërsi të tregut të qytetit, ka ndodhur pas një konflikti për gërvishtjen e makinës. Dyshohet se 27-vjeçari që mbeti i plagosur, Saimir Nikolla dhe autori janë shkëmbyer me automjetet e tyre dhe pas fërkimit, ka lindur një debat i cili degradoi në përdorimin e armës së zjarrit.
Nikolla u qëllua dy herë në këmbë dhe u dërgua menjëherë për ndihmë mjekësore në Spitalin Rajonal të Lezhës, por pasi mori ndihmën e parë dhe duke parë gjendjen shëndetësore, u transportua drejt Spitalit të Traumës në Tiranë për ndërhyrje më të specializuar. Nga verifikimet e kryera nga Policia ai nuk rezulton të jetë person me precedent penal.
Autori, emri i të cilit nuk bëhet i ditur për arsye hetimi sipas policisë, është larguar dhe ndërkohë po punohet për kapjen e tij. Megjithatë grupi hetimor nuk përjashton mundësinë që mes dy të rinjve të ketë pasur ndonjë konflikt të mëparshëm.
Ngjarja ka ndodhur rreth 700 metra larg Drejtorisë së Policisë në momentin kur po prezantohej drejtori i ri i Policisë Vendore të Lezhës, Erigert Mitri, i cili ka zëvendësuar Ferdinand Maren, që ka mbajtur këtë post për rreth 18 muaj. /Opinion.al
