Një sherr ka ndodhur mëngjesin e sotëm në Golem të Durrësit, ku si pasojë ka mbetur i plagosur një 21-vjeçar.
Sipas uniformave blu, mësohet se i riu me iniciale L.Sh. u qëllua me armë në këmbë dhe ndodhet në spital jashtë rrezikut për jetën.
Si autor i dyshuar i ngjarjes, është identifikuar një 36-vjeçar me iniciale Sh.D., banues në Golem.
Ky i fundit është në arrati dhe është shpallur në kërkim nga policia.
“Dyshohet se plagosi me armë zjarri 21-vjeçarin, Policia identifikon 36-vjeçarin dhe po punon për kapjen e tij.
Në orët e para të mëngjesit, në spitalin e Durrësit, është dërguar për mjekim, shtetasi L. Sh., 21 vjeç, banues në Durrës, me dëmtime në këmbë, të dyshuara të shkaktuara me armë zjarri. Ai po merr mjekim dhe është jashtë rrezikut për jetën.
Nga hetimet dyshohet se autori i plagosjes është shtetasi Sh. D., 36 vjeç, banues në Golem.
Po punohet për kapjen e tij dhe për zbardhjen e rrethanave të rastit”, njofton policia.
