Pas më shumë se tre muajsh, Wuhani, i cili konsiderohet dhe vatra kryesore ku shpërtheu pandemia e koronavirusit do të dalë nga izolimi.
Ky vendim erdhi pas një lufte të ashpër kundër virusit të ri Covid-19 dhe mosregjistrimit të asnjë rasti të ri të infektuari në vend për disa ditë radhazi.
Kështu Komisioni i Shëndetësisë në Kinë vendosi që të heqë ndalimin e udhëtimit për të hyrë dhe për të dalë nga provinca e Hubeit duke filluar nga data 25 mars, me një përjashtim për qytetin Wuhan.
Në Wuhan, sipas zyrtarëve të shëndetësisë, këto ndalime udhëtimi do të lehtësohen më 8 prill dhe njerëzit do të kenë mundësi të lëvizin në bazën e një kodi shëndetësor.
Kujtojmë se rastet e para me koronavirus janë shfaqur në Wuhan, në fund të vitit të kaluar. Prej atëherë, ato janë shpërndarë në mbi 150 vende të botës.
Vendet e prekura kanë ndërmarrë masa të ashpra për të frenuar përhapjen e saj, duke mbyllur shkollat, bizneset dhe kufijtë.
Aktualisht, epiqendër e sëmundjes, sipas Organizatës Botërore të Shëndetësisë, është Evropa. Virusi ka prekur mbi 381,000 njerëz në gjithë botën, ndërsa mbi 16,500 kanë humbur jetën./Opinion.al
