Tirana u trondit sot nga një atentat me armë zjarri në zonën e Don Boskos. Objektivi i këtij atentati ishte 45-vjeçari Kastriot Elezaj, i cili u qëllua me armë teksa ishte duke konsumuar kafe me 22-vjeçarin Ronaldo Metushin.
Të dy personat kanë mbetur të plagosur dhe janë transportuar për në spital për ndihmë mjekësore.
45-vjeçari Kastriot Elezaj është një emër i njohur për policinë. Ai ka qenë i dënuar për trafik narkotikësh në Itali. Vetëm pak muaj ka që ka ardhur në Shqipëri, pasi ka qenë ekstraduar në Itali. Pasi ka mbaruar dënimin është rikthyer në Shqipëri.
NGJARJA
Dy personat që mbetën të plagosur më armë zjarri pranë OSHEE në Don Bosko, u qëlluan nga një person, i cili u shfaq në lokalin ku shënjestra Kastriot Elezaj po pinte kafe. Ai ka nxjerrë armën, që dyshohet se ishte e pajisur me silenciator, dhe ka qëlluar në drejtim të tij. Plumbat kapën dhe, 22-vjeçarin Ronaldo Metushi.
Pasi i ka qëlluar autori është larguar nga vendngjarja fillimisht me këmbë, pastaj me një motor. Policia ka gjetur një mjet tip Golf 4 të djegur në zonën e Kamzës, e cila dyshohet se i përket autorit.
Ndërkohë, hetimet për zbardhjen e rrethanave të kësaj ngjarjeje kanë nisur, ndërsa dy të plagosurit po marrin ndihëm mjekësore në spital.
Mësohet gjithashtu se policia po punon për identifikimin dhe kapjen e autorit dhe personave të tjerë të përfshirë në këtë ngjarje.
