Nga Manjola Bregasi
Një grua zbulon papritur në kompjuterin e bashkëshortit, se ai kryen seks virtual në dhomat e chatit me vajza të reja dhe të panjohura. Teksa përballet me të shoqin, ai i përgjigjet se kjo është një mënyrë e mirë e arritjes së kënaqësisë dhe që nuk e prish martesën. A është kjo tradhti-? pyet zonja në një forum në internet. Nga ana tjetër vjen përgjigja standarde e psikologes, që përpiqet ta bindë zonjën të bisedojë me bashkëshortin për ta zgjidhur këtë problem.
A është ky një problem? Në dukje familjet shqiptare mund të ndjehen larg këtij realiteti, por në fakt dhomat e chatit, që cdo ditë popullohen nga vajza të reja dhe tërheqëse nuk janë një realitet i largët dhe i vështirë për t’u arritur nga kushdo që ka një telefon apo kompjuter. E vërtetë, teknologjia ka ndryshuar totalisht mënyrën se si jetojmë, madje edhe mënyrën se si bëjmë seks.
Seksi online duket sot ndoshta zgjidhja për ciftet që jetojnë përkohësisht larg njëri-tjetrit, por mbase edhe mallkimi për familjet e moralshme që e shohin si burim tradhtie. Por a është vërtet kështu? Ky burri i moralshëm të cilin e mori në qafë interneti, a nuk do t’i hidhte sytë tek kolegia e zyrës apo tek ndonjë bukuroshe tjetër nëse për një arsye cfarëdo, do i shkonte ndër mend ta tradhtonte partneren e tij?
E vërtetë, online mund të jetë më e thjeshtë, kështu thonë edhe psikologët. Anonimati e bën më të lehtë joshjen, por edhe më të vështirë përfshirjen emocionale në raport. Por është seksi online tradhti? Për ata që e shohin tradhtinë si mendim, natyrisht që po, për ata që e shohin si kontakt fizik, natyrisht që jo. E c’rëndësi ka? Nëse seksi online të ndihmon ta duash më shumë gruan tënde, thuaj: po faleminderit.
