Deputeti i Partisë Demokratike, Agron Shehaj, në një intervistë për ‘Gazetën Shqiptare’ është shprehur se reforma në drejtësi ka qenë një nga arsyet që e shtyu të hyjë në politikë.
Pikërisht për këtë arsye, deputeti i PD-së i qarkut të Vlorës ka vendosur të përballet në Kuvend dhe jashtë tij pa asnjë mëdyshje me mazhorancën e majtë, të cilën e akuzon ashpër për lidhje të forta me krimin e organizuar.
Sipas tij, opozita duhet të kërkojë hetimin e kryeministrit, pasi në rastin më të mirë Edi Rama ka qenë i informuar nga shërbimi sekret i huaj dhe i brendshëm mbi atë se çfarë bënin ministrat dhe shefat e policisë, si dhe në rastin më të keq, ai ka qenë personalisht i përfshirë.
Nisur nga kjo gjendje, pra, përhapja e kriminalitetit në vend; Agron Shehaj tregon disa arsye kryesore se pse shqiptarët të majtë dhe të djathtë, duhet të mbushin sheshet e Shqipërisë kundër klikës së pushtetit.
Për të, qëllimi i kësaj fryme është që të shkundë shqiptarët, të majtë dhe të djathtë dhe t’u tregojnë se këta të paaftë, mashtrues dhe trafikantë dje vodhën të ardhmen e tyre dhe sot po vjedhin të ardhmen e fëmijëve të tyre.
Sipas tij, krimi dhe shkelja e ligjit është burimi kryesor i varfërisë, pavarësisht se mund të duket pa lidhje. Ai tregon se protesta është kundër sundimit absolut të një grupi njerëzish në kurriz të shumicës së qytetarëve.
“Këta kanë kapur shtetin, trafikojnë, bëjnë ligjet në interes të tyre, ushtrojnë presion ndaj mediave, tani kanë kapur edhe prokurorinë. Ka ndonjë shqiptar aq naiv sa të mendojë që Rama dhe ministrat e tjerë nuk dinin çfarë bënte Tahiri apo që kryeprokurorja e zgjedhur nga pushtetarët socialistë do jetë e lirë dhe e pavarur për të hetuar Tahirin për trafik droge apo Veliaj për vdekjen e Ardit Gjoklaj në landfillin e Sharrës? Angazhimi i Ramës në mbrojtje të Tahirit tregon qartë që Tahiri ka punuar për llogari të elitës së PS-së. Njolla e trafikut të drogës do ndjekë përgjithmonë jo vetëm Ramën, por edhe PS-në”,-thekson Shehaj.
Deputeti i PD-së, gjatë kësaj interviste është ndalur edhe tek çështja e mandatit të qeverisë socialiste, i cili shkurtohet vetëm përmes zgjedhjeve të lira.
Shehaj thekson se opozita nuk është e gatshme për t’i vënë zjarrin Shqipërisë, me qëllimin e vetëm për të marrë pushtetin. Kjo, sipas tij, pushteti nuk është synimi, por mjeti për të ndërtuar një Shqipëri, ku sundon ligji dhe jo pushtetari.
“Pushteti na duhet që t’u kthejmë shqiptarëve lirinë që të ndërtojnë në Shqipëri një të ardhme më të mirë për fëmijët e tyre. Që të krijojmë kushtet që të kthehen investitorët e huaj, ku banditët të jenë në burg dhe jo të bëjnë ligjin, ku të punojnë të gjithë dhe jo vetëm miqtë e ujqërve, të kthehemi te përmbajtja dhe të braktisim kartolinat e propagandës së Ramës dhe Veliajt”,-tha ai.
Shehaj ka folur edhe për çështjen Tahiri, e cila nuk e dëmtoi aspak kryeministrin Rama, pavarësisht pritshmërive të disave.
“Skandali i Tahirit në vend që ta dobësonte, e forcoi më shumë se e detyroi të merrte edhe kryeprokuroren. Kush mendon se nuk duhet të ngrihemi dhe të bëjmë opozitë të fortë se me kalimin e kohës Rama do dobësohet e ka gabim, po shkojmë drejt diktaturës. Sot që flasim Rama ka të gjitha pushtetet, ai arreston, heton dhe dënon çdo qytetar. Ndërkohë që Tahiri mund të dalë jashtë shtetit kur të dojë dhe ish- shefat e tij të policisë janë në kërkim, ndërsa protestuesit e PD ndalohen nga policia në kufi dhe kalojnë net të gjata në qelitë e policisë”,-deklaroi deputeti i PD-së për GSH.
Ai tha se pikërisht kjo fuqi që kryeministri ka mbledhur në duart e tij, kërcënon jetën e kujtdo; madje edhe të tij. Shehaj shprehet se asgjë nuk e ndalon Ramën të kërkojë për t’i mbyllur gojën, për shembull, duke e akuzuar për evazion fiskal apo ndonjë akuzë të një lloji tjetër që mund të ndërtojë.
Sipas tij, kryeministri i ka të gjitha nën kontroll duke filluar nga inspektorët, te shumica parlamentare për t’i hequr imunitetin, te kryeprokurorja për t’a hetuar dhe gjykatësit për t’a dënuar.
“Prandaj ndarja e pushteteve është elementi themelor i demokracive liberale”,-thekson Shehaj.
Burimi: http://www.gsh.al/2018/01/08/nga-konfliktet-bracen-te-raportet-bashen-shehaj-pd-te-kerkoje-hetimin-e-rames/
