Kryediplomati gjerman, Steinmeier, i cili ndodhet për vizitë zyrtare në Tiranë kishte një mesazh të qartë dhe të drejtpërdrejtë për politikanët shqiptarë: Luani pa hile!
Gjatë konferencës së përbashkët për shtyp me Bushatin në Ministrinë e Jashtme, Frank Walter Steinmeier u pyet për situatën politike në Shqipëri dhe mosdakordësinë e palëve për reformën në drejtësi. Ai tha se ishte në dijeni të situatës dhe kishte këtë mesazh:
“Palët duhet të bëhen bashkë për të ardhmen e vendit, në mënyrë që të hapen bisedimet për anëtarësim në BE. Politikanët duhet të jenë “Fair Play” në këtë debat. Agresiviteti në debate (që e kemi vënë re këtu në Shqiëpiëri) nuk e ndihmon çështjen”, u shpreh Steinmeier.
Më tej ai tha: “Ne kemi interes që ky vend të bëjë përpara. Reforma në sistemin e drejtësisë është në vëmendje të opinionit publik. Ajo çka gjendet në tryezë është një projekt që do të kujdeset për më tepër pavarësi në sistemin e drejtësi, do krijojë premisa të besueshme në luftën kundër korrupsionit. Shpresoj që ky projekt të miratohet”.
Mesazhi i Steinmeier. për opozitën ishte: “Jo çdo gjë zgjidhet duke bllokuar”, duke theksuar se ndonjëherë është e nevojshme që opozita të lëshojë në kërkesat e saj.
“Në opozitë nuk fitohet vetëm duke bllokuar. Ka situata që një qeveria merr reforma për avancimin e vendit, ndërsa për një opozitë nuk duhet menduar për avantazhet afatshkurta. Unë i kam përjetuar të dyja këto situata”, tha Steinmeier. /Opinion.al
