Departamenti amerikan i Shtetit kritikoi urdhrin e presidentit rus, Vladimir Putin, për t’iu lehtësuar procedurat e marrjes së shtetësisë ruse atyre që jetojnë në territoret separatiste të Ukrainës.
“Rusia, me këtë veprim provokues, po intensifikon sulmin e saj mbi sovranitetin dhe integritetin territorial të Ukrainës”, tha Departamenti i Shtetit Amerikan.
Dekreti u botua në faqen zyrtare të internetit të Kremlinit, ndërsa Presidenti tha ky ligj i ri bëhet “thjesht për çështje humanitare”, pasi sipas tij njerëzit që jetojnë në rajonet Donjeck dhe Luhansk janë “plotësisht të privuar nga të drejtat civile” dhe nuk mund të “lëvizin normalisht” ose “të realizojnë nevojat e tyre elementare”.
Por Ukraina reagoi ashpër ndaj dekretit. Ekipi i presidentit të zgjedhur të Ukrainës, Volodmyr Zelensky, tha se përmes tij, Rusia “e ka pranuar përgjegjësinë e saj si shtet pushtues”, ndërsa Ministria e Jashtme e Ukrainës e cilësoi atë si “agresion dhe ndërhyrje”.
Dekreti vlen për njerëzit që jetojnë në raojnet Donjeck dhe Luhansk të Ukrainës, të cilat janë kapur nga separatistët pro-rusë në vitin 2014, pasi Rusia ka aneksuar Gadishullin ukrainas të Krimesë. Prej atëherë, konflikti në këto rajone ka marrë rreth 13,000 jetë njerëzish./Opinion.al
