Zëvendësministri i Jashtëm rus, Sergei Ryabkov pohoi për agjencinë shtetërore të lajmeve ruse, TASS se me 19 mars, do të takohet në Romë me diplomatin e SHBA-së, Elliott Abrams.
Ai i ka përshkruar bisedimet e ardhshme me Përfaqësuesin e Posaçëm të Shteteve të Bashkuara për Venezuelën si “biseda të planifikuara” dhe si një takim i cili është thirrur posaçërisht në përgjigje të përkeqësimit të kushteve në Venezuelë.
Takimi u bë i ditur dhe nga Departamenti Amerikan i Shtetit, i cili njoftoi se Abrams do të qëndrojë në Romë më 18 dhe 19 mars, ku do të takohet dhe me Ryabkhovin për të “diskutuar për përkeqësimin e situatës në Venezuelë”.
Kujtojmë se Rusia dhe Amerika ndajnë pikëpamje krejtësisht të ndryshme lidhur me konfliktin politik në Venezuelë, vend ky që po përballet me kolapsin ekonomik dhe një krizë humanitare të thellë.
Shtetet e Bashkuara dhe shumica e vendeve perëndimore përkrahin liderin opozitar, Juan Guaido, i cili ka shpallur veten president të përkohshëm më 23 janar ndërsa Rusia, Kina, Irani, Kuba, Turqia, Bolivia mbështesin Maduron. Maduro drejton vendin prej vitit 2013, dhe fitoi një tjetër mandat presidencial në maj të vitit 2018. Zgjedhjet u bojkotuan nga opozita dhe u kritikuan ashpër nga faktori ndërkombëtar. Maduro është përballur gjithashtu me akuza për abuzime me të drejta të njeriut si dhe për keqmenaxhim të ekonomisë së Venezuelës./Opinion.al
