Shtetet e Bashkuara të Amerikës kanë arritur një marrëveshje të re tregtare me Japoninë. Presidenti Dobald Trump thotë se SHBA ka rënë dakord për një marrëveshje tregtare ‘masive’.
Japonia ka rënë dakord të investojë 550 miliardë dollarë në SHBA, ndërsa mallrat e saj të shitura në Amerikë do të tatohen me 15% kur të mbërrijnë në vend – nën tarifën prej 25% që kishte kërcënuar Trump.
Përmes një posti në rrjetet sociale, Trump tha se Japonia do ta hapte ekonominë e saj për mallrat amerikane, duke përfshirë makinat, kamionët, orizin dhe produkte të caktuara bujqësore.
Kryeministri i Japonisë, Shigeru Ishiba, e përshëndeti njoftimin, duke thënë se ishte “shifra më e ulët deri më sot midis vendeve me suficite tregtare me SHBA-në”.
“Sapo nënshkrova marrëveshjen më të madhe tregtare në histori, mendoj se ndoshta marrëveshja më e madhe në histori me Japoninë“, tha Trump në një aktivitet në Shtëpinë e Bardhë të martën në mbrëmje.
“Ata kishin njerëzit e tyre më të mirë këtu, dhe ne punuam për të gjatë dhe shumë. Dhe është një marrëveshje e shkëlqyer për të gjithë. Gjithmonë them se duhet të jetë e shkëlqyer për të gjithë. Është një marrëveshje e shkëlqyer“, shtoi ai.
Ishiba deklaroi sot se marrëveshja do të thotë që tarifat e SHBA-së për automjetet dhe pjesët do të ulen në 15% nga 25%.
Megjithatë, taksa është mbi 10% që Trump i vendosi Japonisë dhe vendeve të tjera kur pezulloi të ashtuquajturat tarifa reciproke më të larta midis prillit dhe korrikut.
“Ne ishim të parët në botë që ulëm tarifat për makinat dhe pjesët e automjeteve pa asnjë kufizim sasior”, u shpreh lideri japonez.
Makinat e Mbretërisë së Bashkuar të dërguara në SHBA tatohen me një normë më të ulët prej 10% kur mbërrijnë në brigjet amerikane, por kjo kuotë është e kufizuar në 100,000 automjete.
“Marrëveshja nuk përfshin asnjë ulje të tarifave nga ana japoneze”, shton Ishiba.
Investimi i planifikuar në SHBA nga Japonia i përfshirë në njoftim “do të jetë një nxitje e madhe për të rikthyer SHBA-në, duke u përshtatur me historinë e Trump për ringjalljen e prodhimit amerikan me më shumë vende pune”, shtoi ai.
