Lulzim Basha dhe Edi Rama kanë replikuar në distancë për protestën e nesërme. Fillimisht ishte kreu i demokratëve Lulzim Basha, i cili në një status në Facebook shkroi se përgjegjësia për çdo pengesë për protestën i takon qeverisë.
“Shqiptarët do të vijnë të bashkuar dhe të vendosur nesër në Tiranë! 16 shkurti është dita kur një popull që është vjedhur, është tradhëtuar, është poshtëruar nga një klikë që e varfëron përditë, ngrihet të marre në dorë fatet e tij si cdo popull Europian. Në Europë ku duam të shkojmë, kur qeveria kapet duke vjedhur, ndëshkohet qeveria, IKIN HAJDUTET NË BURG! Nuk VUAN populli! Përgjegjësia për cdo pengesë që i bëhet të drejtës së shqiptarëve për të protestuar kundër pushtetit të vjedhur me votat e krimit do bjerë e gjitha mbi këtë qeveri hajdute dhe kryehajdutin e saj! Sovrani në Republikën e Shqipërisë është populli shqiptar!”, ka shkruar Basha.
Disa minuta më pas, kryeministri Rama nëpërmjet një statusi në Twitter, referuar edhe akuzave opozitare se takimi i nesërm në Vlorë do të jetë një anti-miting, e sfidon Bashën duke thënë se është dialog qytetar dhe do të mbledhë më shumë njerëz se në protestën e nesërme.
“Na qenkan shqetësuar andej nga Mavroboja për takimin e Vlorës nesër?Presion i madh për t’i sjellë njerëzit në miting thonë?S’është miting o mavri me bojë po dialogu qytetar #BashkiaQëDuam prandaj mos na bëni reklamë aman të keqen, se i thonë Vlorë dhe s’kemi ku ulim njerëzit?”, shkruan Edi Rama.
