Edhe pse tashmë sezoni turistik ka nisur, Vlora po përballet me ndërprerje të furnizimit me ujë.
Ujësjellës Kanalizime, Rajoni Vlorë bën me dije se këto ndërprerje kanë ardhur si pasojë e stakimeve të energjisë elektrike në zonat ku ndodhen stacionet e ujësjellësit, si dhe për shkak të një avarie në një nga stacionet kryesore.
Janë regjistruar stakime të energjisë që kanë shkaktuar anomali në procesin e transmetimit dhe shpërndarjes së ujit në qytetin e Vlorës.
Këto probleme kanë sjellë mungesë furnizimi me ujë gjatë orëve të para të mëngjesit të sotëm në një pjesë të madhe të qytetit. Autoritetet bëjnë me dije se situata do të vazhdojë të shoqërohet me ndërprerje të tjera të pjesshme gjatë ditës, për të mundësuar furnizimin e depove me ujë dhe rregullimin e rrjetit.
