Presidenti Bajram Begaj dhe ambasadorët e Britanisë së Madhe e Gjermanisë, kanë qenë të parët që kanë mbërritur në seancën plenare që nis në orën 17:00 dhe çel sesionin e ri parlamentar për vitin 2024. Presidenti Bajram Begaj do të mbajë një fjalim para ligjvënësve.
Menjëherë pas tyre ka mbërritur edhe kryedemokrati, Lulzim Basha i shoqëruar nga deputeti Enkelejd Alibeaj.
Nga ana tjetër, Gazment Bardhi ka paralajmëruar se do të vijojë skenarin e aksionit të opozitës në Kuvend. Bardhi në një reagim të bërë thotë se nuk janë njoftuar as nga Kuvendi e as nga Presidenca për praninë e Begajt. Madje sipas tij, Presidenti po përdoret nga mazhoranca si fasadë për një normalitet të rremë, ndërsa thekson se do të vijojnë me kaosin pavarësisht pranisë së kreut të shtetit.
“Presidenti Begaj ka të gjitha mundësitë kushtetuese për të garantuar respektimin e Kushtetutës dhe ne gjejmë rastin t’i bëjmë thirrje që të mos keqpërdoret nga mazhoranca si fasadë për një normalitet të rremë në Kuvendin e Shqipërisë. Opozita është e vendosur për të mos lejuar funksionimin normal të Parlamentit, deri në mundësimin e të drejtave të saj kushtetuese”, thotë Bardhi në deklaratë.
Ndërkohë kreu i grupit parlamentar të PS-së Bledi Çuçi u ka kërkuar deputetëve të mos mungojnë në seancën e somte ku pritet të kalojnë edhe dekretet për ministrat e rinj. Çuçi shprehu keqardhje për qëndrimet e deritanishme të opozitës që ka paralajmëruar se do të vijojë me tentativat për të bllokuar jetën parlamentare.
Sot pritet të dekretohen ndryshimet në kabinetin qeveritar, shkarkimi i Elva Margaritit, si Ministre e Kulturës dhe Ervin Mete, si Ministër i Financave dhe Ekonomisë dhe emërimin e këtij të fundit si Ministër i Financave dhe Blendi Gonxhja si Ministër i Ekonomisë, Kulturës dhe Inovacionit. Po ashtu edhe miratimi i dekretit për emërimin e Adea Pirdenit si ministre e shtetit për Administratën Publike dhe Anti-Korrupsionin.
Deputetët i kthehen punimeve të Kuvendit të Shqipërisë me një rregullore të re me përjashtim deri në 60 ditë, por pavarësisht kësaj grupi i Gazment Bardhit dhe deputetët e Berishës do të vijojnë me strategjinë e përpjekjeve për bllokimin e seancave. Ish-kryeministri Berisha nuk do të marrë pjesë për shkak se ndodhet në arrest shtëpie për aferën ‘Partizani’.
Ligjvënësit lanë pas një sesion mes kaosit, flakadanëve dhe disa nismave ligjore që presin 84 vota. Peng i bashkimit të kartonëve janë amnistia penale, rritja e pagave për “Kushtetuesen” dhe zgjedhja e avokatit të ri të popullit, por edhe Reforma Zgjedhore. PS i ka shtrirë dorën opozitës që të bashkojnë votat për amnistinë penale.
Nga mbledhja dyditore e qeverisë në Shëngjin, kryeministri Edi Rama tha hapur se mungesa e 84 votave nuk janë kusht për reformat dhe se socialistët do ta gjejnë një alternativë për të ligjet me shumicë të cilësuar.
Sa i takon skenarit të kaosit, kreu i qeverisë e bëri të qartë pak ditë me parë se edhe në këtë sesion të ri parlamentar tymueseve të opozitës do t’i përgjigjen me kartonët jeshilë, pra duke miratuar ligjet pa zhvilluar debate, ndërsa diskutimet do të zhvillohen në komisione në mbledhje online sa kohë sipas tij nga ana tjetër do të hidhen flakadanë dhe do të tentohen përleshje fizike.
