Mijëra persona dolën sërish në sheshet kryesore të Parisit për të kundërshtuar reformën në pensione të propozuar nga presidenti Emmanuel Macron.
Ndonëse qeveria u tërhoq nga disa pika të kësaj reforme, protestuesit deklaruan se nuk pranojnë lëmoshë dhe kërkojnë mos aplikimin e saj.
Të pranishmit në manifestime edhe një herë lëshuan slogane kundër rritjes së moshës së daljes në pension në 64 vjeç, e cila sipas tyre është e papranueshme.
Sindikatat kanë mundur të thërrasin njerëz nga profesione të ndryshme që t’i bashkohen protestës e cila është përhapur njëkohësisht në të gjitha qytetet e Francës dhe në disa raste manifestime nxorrën deri në 1 milionë njerëz në rrugë.
Drejtuesit e këtyre organizimeve kanë kërcënuar se nëse nuk do të tërhiqet nga kjo nismë që po diskutohet tashmë në parlament, atëherë në 7 mars do të mbajnë një protestë të madhe që do të bllokojë të gjithë vendin.
Nga ana tjetër, presidenti Macron shprehet se nuk ka ndërmend që të tërhiqet nga kjo reformë pasi sipas tij i gjithë sistemi i pensioneve është në prag të kolapsit.
