Vijojnë edhe këtë të mërkurë protestat në Veri të Kosovës.
Dhjetëra protestues janë mbledhur para komunës së Zveçanit, ku ushtarët e KFOR-it kanë marrë masa për ruajtjen e rendit dhe sigurisë.
Sikurse duket në foto KFOR ka vendosur tela me gjëmba përpara institucioneve.
Qytetarët serbë kanë paralajmëruar protesta më të fuqishme ditën e sotme. Me dhjetëra protestues janë mbledhur edhe para ndërtesës së komunës në Zubin Potok.
Në komunat veriore të vendit ku serbët po protestojnë prej disa ditësh kundër prezencës së Policisë së Kosovës dhe kryetarëve shqiptarë të këtyre komunave, nata ka kaluar e qetë.
Pjesëtarë të KFOR-it dhe të Policisë së Kosovës kanë mbajtur nën kontroll situatën.
Në veri të Mitrovicës pranë ndërtesës së komunës nuk ka pjesëtarë të KFOR-it dhe as prani të shtuar të policëve, përveç një automjeti të këtyre të fundit që ndodhet disa metra larg objektit komunal.
Përfaqësues të Listës Serbe, partisë më të madhe të serbëve në Kosovë, kanë thënë se do t’i vazhdojnë protestat derisa të përmbushen kërkesat e tyre.
Ata kërkojnë që të tërhiqen kryetarët shqiptarë të komunave si dhe njësitet speciale të Policisë së Kosovës nga veriu i Kosovës, i banuar me shumicë serbe.
