Ka nisur seanca plenare në parlament me diskutimet e deputeteve të opozitës. Kreu i Partisë Republikane, Fatmir Mediu, ka treguar në foltoren e Kuvendit arsyet pse qytetarët duhet t’i bashkohen protestës së opozitës, të shtunën më 27 janar. “Një popull që nuk përballet me të keqen është i destinuar të përulet, të largohet nga vendi”, u shpreh ai.
“Sipas timonierit, ne mund të bëhemi europianë vetëm duke ndenjur urtë e mos folur. Ishte kjo e djathtë, kjo opozitë që bëri më të mirën për shqiptarët, duke liberalizuar vizat. Ndërsa sot kemi vetëm propagandë droge, që ka vetëm një qëllim, të ndërtojë një shoqëri pa vlera, cinike, të përulur. Kjo është e papranueshme. Kush duhet të protestojë? Një popull që nuk përballet me të keqen është e destinuar të përulet, të largohet. Duhet të shembim këtë mur të ndërtuar mes qeverisjes dhe qytetarëve të thjeshtë, ndaj duhet të bashkohemi më 27 janar. Largimi i së keqes është qëllimi i të gjithëve”, deklaroi Mediu në foltoren e parlamentit.
