Kompeticionet e ndryshme ndërkombëtare apo së fundmi Samiti i Komunitetit Politik Evropian që u zhvillua në Tiranë, sipas ekspertëve i shërbejnë pozitivisht edhe sektorit të turizmit të vendit tonë.
“Mendoj që e kemi kapërcyer fazën e dobisë ndaj marketingut ndërkombëtarë të çdo lloji. Pra qoftë ky marketingu mais, pra marketingu i eventeve, qoftë marketingu i përgjithshëm që ne e bëjmë nëpër panaire, me anë të blogerëve, me anë të personazheve të njohur, apo qoftë edhe nga vetë turistët që vijnë këtu dhe lënë përshtypje të mira për Shqipërinë. Jemi në fazën ku duhet të menaxhojmë situatën e brendshme, e cila na vjen si efekt i marketingut të jashtëm”, tha Flora Xhemani Baba, eksperte turizmi.
Pritshmëritë për një sezon të suksesshëm janë të mëdha, por njëkohësisht ekspertët theksojnë se ka ardhur koha të mendohet seriozisht edhe për turizmin elitar.
“Sezoni ka treguar çdo vite se ka rritje edhe në kërkesë edhe në fluks edhe në prurje ekonomike, pra në të ardhura. Mendoj që sezoni sidoqoftë treguesit do t’i ketë të gjithë pozitivë në makro. Koha ka qenë gjithmonë për ta trajtuar turizmin tonë si një mundësi për ta ofruar si turizëm elitar. Për shkak se ne jemi një vend i vogël dhe të ardhurat që marrim nga turizmi në raport me numrin e turistëve që vijnë në Shqipëri, janë jashtëzakonisht të pabarabarta.”
Për shkak të fluksit të lartë të turistëve veçanërisht në sezonin veror, transporti publik dhe trafiku mbeten shqetësuese.
“Problemet do t’i kemi edhe në sezon, me trafikun, me transportin ose me infrastrukturën urbane dhe interurbane brenda qyteteve dhe midis qyteteve bregdetare. Kemi probleme me parkingjet publike dhe private. Pra ku do të parkohet gjithë ai fluks?”
Vitet e fundit Shqipëria po përballet me vizitorë të shumtë, jo vetëm gjatë verës, por përgjatë gjithë vitit, duke bërë që vendi ynë të jetë një destinacion i rëndësishëm për të huajt. Klan News
