Samir Mane, disa ditë më parë u rendit nga prestigjiozja Forbes në listën e miliarderëve të botës duke e bërë biznesmenin të parin në Shqipëri dhe Ballkanin Perëndimor që bëhet pjesë e renditjes. Pasuria e tij është vlerësuar në 1.4 miliardë dollarë.
Në emisionin “Opinion” në Tv Klan, Mane tregoi si mësoi lajmin për renditjen dhe zbuloi që njerëzit e parë me të cilët e ndau ishte familja. Por cilët janë faktorët që e bëjnë atë miliarderin e vetëm edhe në rajonin e Ballkanit Perëndimor krahasuar me shtete që janë më të mëdha e të fuqishme ekonomikisht se sa Shqipëria?
Veç kësaj, biznesmeni theksoi edhe dy aspekte të tjera të rëndësishme nga lista e Forbes lidhur me rritjen e numrit të miliarderëve. Së pari, rikthimi në listë i Arabisë Saudite dhe së dyti, 67% e listës përbëhet nga miliarderë që e kanë krijuar pasurinë nga zero.
Blendi Fevziu: Jeni i vetmi miliarder i gjithë Ballkanit Perëndimor, flas duke futur edhe Kroacinë që është vend i Bashkimit Europian, ku njëri prej miliarderëve, i vetmi miliarder i Kroacisë është në fakt rus me pasaportë kroate, ruso-kroat. Si shpjegohet që Serbia, një vend i madh flas, Kroacia nuk kanë miliarderë?
Samir Mane: Padyshim që ekonomitë e tyre janë shumë të mëdha, por kjo do të thotë që një pjesë e madhe e tyre punojnë me partnerë, pra kanë kompani të mëdha por janë 3-4 partnerë. Këtu bëhet fjalë për të ardhura individuale, jo të kompanive. Ka shumë kompani të mëdha në Kroaci, ka pasur Kroacia dhe ka rënë, ka pasur një miliarder i cili nuk është më në listën e Forbes, pra këtu bëhet fjalë për të ardhura individuale sepse një pjesë e madhe në traditën europiane është me partnership, punojnë 3-4 partnerë në një projekt. Unë jam i sigurt që edhe mund të ketë ose mund të jenë në proces.
Blendi Fevziu: Të paktën që prej 15-20 vjetësh që unë e shoh me kuriozitet listën e Forbes, kam vënë re edhe një ndryshim tjetër që më bëri përshtypje, Turqia ka qenë një vend me 3-4 miliarderë para 20 vjetësh po themi, aty-aty me Greqinë, ndërkohë që sot Turqia ka një bum të madh miliarderësh në raport me Greqinë. Për çfarë arsyeje ndodh?
Samir Mane: Natyrisht që është ekonomi e madhe, ka prodhim shumë të madh bruto, eksporte shumë të mëdha dhe padyshim që tashmë i ka ardhur koha që të prodhojnë miliarderët e vet sepse ekonomia është një ekonomi e madhe që prodhon shumë për eksport. Por e rëndësishmja e kësaj liste është që e para bota ska parë kurrë kaq shumë miliarderë.
Blendi Fevziu: Si shpjegohet kjo, miliarderët vetëm rriten?
Samir Mane: Këtë vit ka pasur rritjen më të madhe historike, padyshim vjen edhe nga rritja e ekonomisë botërore, edhe nga faktorë të tjerë.
Blendi Fevziu: Ama vetëm 1 shtet ishte shtuar, 77 shtete ishin, 78 që i bie duhet të jetë shtesa e Shqipërisë.
Samir Mane: Vjen edhe nga rikthimi në listën Forbes të Arabisë Saudite. Ata për një kohë të gjatë nuk kanë qenë në listë, tashmë janë rikthyer në listë kështu që një pjesë e madhe e miliarderëve vijnë nga Arabia Saudite. E dyta, çka është për t’u parë në listë dhe shumë e rëndësishme, është 2029 miliarderë nga 3029 janë të bërë vetë. 67% e Forbes sot janë njerëz që e kanë filluar nga zero në çdo cep të planetit dhe kjo është një optimizëm i madh për të gjithë të rinjtë, por jo vetëm të rinjtë që ta shohin mundësinë për të ecur, për t’u zhvilluar, për të krijuar ekonomi vetjake në çdo shkallë të jetës sepse është shumë e rëndësishme që nga 3000, 2000 të jenë ‘selfmade’. Pra e rrit optimizmin maksimal që njerëzit të shkojnë drejt sipërmarrjes private.
