Deputeti i PD-së, Ervin Salianji në seancën e sotme plenare në Kuvendin e Shqipërisë, ka hedhur një akuzë të rëndë, duke thënë se Ervis Martinaj është lajmëruar 5 minuta para se Policia e Shtetit të mbërrinte, që të largohej nga hoteli ku është parë për herë të fundit. Nga foltorja e Kuvendit Salianji iu drejtua Çuçit duke thënë se keni pasur plan tjetër.
“Ju kanë ikur personat me rekordet më të tmerrshme, di gjë ku e ke Talo Çelën. Kur del e-maili që policia di që ai qarkullon në mes të qytetit, ndërkohë që nxirrni policët me nga dy turne në postblloqe. Ku e keni Suel Çelën, po Fatos Goga, Florenc Çapja, Kamber Mehja. Po Ervis Martinaj ku është? S’i jepni dot përgjigje, nëse është gjallë apo vdekur. Ju e dini, dhe po e them këtu atë që qarkullon nën zë te drejtuesit e policisë. 5 minuta para se të shkonte në hotel policia e shtetit, e keni lajmëruar që të largohej, sepse keni pasur tjetër plan”, tha Salianji.
