Hetuesit belgë kanë zbuluar planin e fshehtë të terroristëve për sulmet në Bruksel.
Mediat belge raportojnë se, Salah Abdeslam bashkë me terroristët e tjerë synonin që të kryenin një sulm të njëjtë me ato të Parisit, ku mbetën të vrarë 130 persona.
Sipas hetuesve, Absedlam bashkë me Mohamed Belkaid dhe Amine Choukri donin të kryenin sulm me kallashnikovë dhe armë të tjera, ndërsa pjesa tjetër e grupit do të hidhte veten në erë.
Por ata nuk e kanë realizuar dot një plan të tillë pasi u ka dështuar, raporton televizioni belg VRT. Kjo pasi policia belge arrestoi Abdeslamin
dhe Choukrin në Molenbeek, duke evituar kështu një sulm akoma edhe më të frikshëm dhe që do të rezultonte me më shumë viktima.
Abdeslam u kap në Bruksel, vetëm katër ditë para sulmit ku vdiqën 31 persona dhe u plagosën 270 të tjerë. Sipas avokatit të tij, 26-vjeçari nuk kishte dijeni për sulmet në kryeqytetin belg.
Pas arrestimit katër muaj pasi ishte shpallur në kërkim, Abdeslam tashmë ka hequr dorë nga refuzimi për t’u ekstraduar në Francë. “Salah kërkon që të ekstradohet në Francë sa më shpejt të jetë e mundur”, tha avokat Sven Mary.
