Ka nisur sot zhvendosja e 13 kafshëve të “Safari Park” në Fier. Policia dhe veterinerët kanë hapur me forcë portën kryesore të kopshtit zoologjik privat për të hequr nga aty kafshët që mbahen në kushte të mjerueshme. 13 kafshët do të transportohen në kopshtin zoologjik të Tiranës. Tre luanët do të trasnferohen më pas në Holandë dhe prej andej në Afrikë.
Anduel Xhalia është Drejtori i Përgjithshëm i Policisë Pyjore. Ai u shpreh se sot do të bëhet mbyllja e parkut. Xhalia tha se kafshët do të sekuestrohen të gjitha sot. Sipas tij, ka kaluar çdo afat për dorëzimin e dokumentave. Ai shton se kërkohet ndërhyrje e menjëhershme, pasi nuk dihet në ç’gjendje janë kafshët.
Ka reaguar ndërkohë edhe avokati i “Safari Park” në Fier, Elvis Sulejmani. Ai është shprehur se janë përmbushur të gjitha detyrat e kërkuara. Sipas tij, afati për dorëzimin e dokumentave mbaron nesër (e hënë, 29 tetor). Ai shton se “Safari Park” në Fier nuk është në kushte aq të rënda sa të sekuestrohen kafshët.
“Ne i kemi përmbushur të gjitha detyrat sipas procesverbalit të datës 17 tetor. Inspektorët e Mjedisit janë në dijeni të këtij fakti dhe vijnë qëllimisht ditën e dielë për të marrë kafshët forcërisht dhe në shkelje të ligjit,” tha Sulejmani./Opinion.al
