Zëvendëskryeministri i Rusisë, Alexander Novak, tha të enjten se qeveria ruse do të mblidhet së shpejti për të diskutuar mundësinë e ndalimit të eksporteve të gazit drejt Europës. Presidenti Vladimir Putin tha të mërkurën se Rusia mund të ndalojë furnizimet me gaz menjëherë, në një kohë kur çmimet e energjisë janë rritur për shkak të krizës me Iranin.
Ai e lidhi këtë vendim të mundshëm, për të cilin tha se ende nuk është marrë, me dëshirën e Bashkimit Evropian për të ndaluar blerjet e gazit rus dhe të gazit natyror të lëngshëm (LNG). “Do të mblidhemi së shpejti, sipas udhëzimeve të presidentit, për të diskutuar situatën aktuale me kompanitë e energjisë dhe rrugët e mundshme të transportit për furnizimet tona energjetike”, u tha Novak gazetarëve.
Ai shtoi se do të diskutohet me kompanitë energjetike ruse se si të përdoren burimet e energjisë së Rusisë në mënyrën më fitimprurëse. Shitjet e gazit rus drejt Evropës kanë rënë ndjeshëm që nga viti 2022 për shkak të sanksioneve të lidhura me luftën në Ukrainë.
Megjithatë, Rusia mbetet furnizuesi i dytë më i madh i LNG-së për Bashkimin Evropian dhe ende shet gaz përmes gazsjellësit TurkStream pipeline që kalon nëpër Detin e Zi drejt vendeve si Hungaria, Sllovakia dhe Serbia (që nuk është anëtare e BE-së). Novak tha se gazi rus përbën më shumë se 12% të furnizimit të Europës.
Sipas të dhënave të Eurostat, pjesa e gazit rus në importet e gazit me tubacione të BE-së ra nga rreth 40% në vitin 2021 në rreth 6% në vitin 2025. Kur përfshihet si gazi me tubacione ashtu edhe LNG-ja, Rusia përbënte rreth 13% të totalit të importeve të gazit të BE-së në vitin 2025. Gjithashtu, pjesa e Rusisë në importet e LNG-së të BE-së ra në 16% në vitin 2025, nga 21% që ishte në vitin 2021, sipas të dhënave të Eurostat.
