Gjykata e Lartë e Rusisë ka njoftuar se ka lënë në fuqi një vendim për heqjen e talebanëve nga lista ruse e organizatave terroriste, një veprim simbolik që synon forcimin e marrëdhënieve midis Moskës dhe Kabulit.
Që kur talebanët u kthyen në pushtet në Afganistan në verën e vitit 2021, vendi ka qenë i izoluar nga komuniteti ndërkombëtar.
“Vendimi hyn në fuqi menjëherë”, tha gjyqtari përgjegjës për çështjen, sipas agjencive ruse të lajmeve pas një seance dëgjimore me dyer të mbyllura. Megjithatë Vendimi i Gjykatës së Lartë, nuk përputhet me atë të Moskës në këtë fazë.
Në mars, zyra e prokurorit rus kërkoi që talebanët të hiqen nga lista e organizatave të përcaktuara si “terroriste” në Rusi. Talebanët ishin në listë që nga viti 2003, pas sulmeve terroriste të 11 shtatorit 2001.
Talebanët morën Kabulin më 15 gusht 2021, pas rënies së qeverisë së mbështetur nga SHBA, e ndjekur nga tërheqja e plotë e trupave amerikane disa ditë më vonë.
Që atëherë, Moska ka lëvizur për të normalizuar marrëdhëniet me qeverinë e re të talebanëve afganë, të cilën e sheh si një partner potencial ekonomik dhe kundër terrorizmit.
Megjithatë, deri më sot, qeveria talebane nuk është njohur zyrtarisht nga asnjë vend, veçanërisht për shkak të përkeqësimit të situatës së të drejtave të grave në Afganistan.
Megjithatë, përveç Rusisë, Pakistani, Kina, Irani dhe shumica e vendeve të Azisë Qendrore mbajnë marrëdhënie diplomatike de fakto me autoritetet afgane.
Moska ka pritur të dërguarit e talebanëve në Rusi në disa raste, madje edhe para kthimit të tyre në pushtet.
Afrimi midis Kremlinit dhe Kabulit u duk se u përshpejtua pas një sulmi në mars 2024 pranë Moskës, kur 145 njerëz u vranë në një sallë koncertesh nga katër persona të armatosur nga Shteti Islamik në Khorasan, dega afgane e organizatës xhihadiste.
Në korrik 2024, presidenti rus Vladimir Putin tha se ai i konsideronte talebanët “aleatë në luftën kundër terrorizmit”.
Tetorin e kaluar, ministri i Jashtëm rus, Sergei Lavrov i bëri thirrje Perëndimit të heqë sanksionet kundër Afganistanit dhe të marrë “përgjegjësinë” për rindërtimin e vendit, i cili është shkatërruar nga dekada të tëra lufte.
Sekretari i Këshillit të Sigurimit të Rusisë, Sergei Shoigu vizitoi Kabulin në fund të dhjetorit, një vizitë e rrallë nga një zyrtar i huaj i rangut të lartë, gjatë së cilës ai shprehu dëshirën e tij për të forcuar “bashkëpunimin” me Afganistanin.
Shumë udhëheqës talebanë luftuan në luftën dhjetëvjeçare të Bashkimit Sovjetik në Afganistan në vitet 1980.
