Një gazetar amerikan që punon për The Wall Street Journal është arrestuar në Rusi me dyshimin për spiunazh. Kështu është shprehur agjencia më e lartë e sigurisë në Rusi.
Evan Gershkovich, një reporter me përvojë, punonte në Yekaterinburg në kohën kur u ndalua.
Wall Street Journal tha se ishte “thellësisht e shqetësuar” për sigurinë e tij dhe mohoi me forcë akuzat kundër Gershkovich.
Kremlini pretendon se gazetari ishte “kapur në flagrancë”.
Agjencia më e lartë e sigurisë tha se reporteri “kishte vepruar sipas udhëzimeve të SHBA duke mbledhur sekrete shtetërore në lidhje me aktivitetet e një ndërmarrjeje ruse të mbrojtjes. Një çështje penale spiunazhi tashmë është hapur nga Shërbimi Federal i Sigurisë (FSB), për gazetarin.
Shkrimi i fundit i Gershkovich këtë javë raportoi mbi ekonominë në rënie të Rusisë dhe sesi Kremlini duhej të përballej me “shpenzimet ushtarake” duke ruajtur shpenzimet sociale.
Në një deklaratë, Wall Street Journal tha se qëndronte në solidaritet me reporterin dhe familjen e tij: “Wall Street Journal mohon me forcë akuzat nga FSB dhe kërkon lirimin e menjëhershëm të reporterit të besuar dhe të përkushtuar, Evan Gershkovich”.
Kremlini komentoi ndalimin e gazetarit amerikan përmes një zëdhënësi. “Kjo është përgjegjësi e FSB-së, ata tashmë kanë lëshuar një deklaratë,” tha një zëdhënës. “E vetmja gjë që mund të shtoj është, me sa dimë, ai u kap në flagrancë”.
Edhe para pushtimit në shkallë të plotë të Ukrainës në shkurt 2022, raportimi nga Rusia ishte bërë gjithnjë e më i vështirë.
Gazetarët e pavarur u etiketuan “agjentë të huaj” dhe korrespondentja e BBC Rusisë Sarah Rainsford u dëbua nga vendi.
